"Azəristiliktəchizat" ASC-də Avstriya İqtisadiyyat Palatası və AZPROMO-nun birgə təşkilatçılığı ilə Avstriya-Azərbaycan şirkətlərinin və təşkilatlarının ikitərəfli görüşləri çərçivəsində Avstriyanın "Klinger Fluid Control" şirkətinin nümayəndələri ilə görüş keçirilmişdir.
Görüşdə iştirak edən Avstriya İqtisadiyyat Palatasının nümayədəsi xanım Eva Maria Wethaler və "Klinger Fluid Control" şirkətinin nümayəndəsi Grzegorz Dabrowski Bakıya səfərləri haqqında məlumat verərək "Klinger Fluid Control" şirkətinin yüz ildən artıq fəaliyyət göstərdiyini, müxtəlif sahələr üçün etibarlı bağlanma klapanları və digər avadanlıqların istehsalı üzrə dünyada aparıcı mövqe tutduqlarını qeyd ediblər.
"Azəristiliktəchizat" ASC sədrinin vəzifələrini müvəqqəti icra edən İlham Mirzəliyev qonaqlara "Azəristiliktəchizat" ASC-də həyata keçirilən layihələr və istilik təchizatı sahəsində aparılan islahatlar çərçivəsində qarşıda duran əsas vəzifələr haqqında məlumat verib. İ.Mirzəliyev qeyd edib ki, bu gün "Azəristiliktəchizat" ASC tərəfindən Bakı şəhəri və respublikanın regionlarında 564 qazanxana istismar olunmaqla 3879 yaşayış binası, 184 mindən artıq mənzil, 288 məktəb, 166 uşaq bağçası, 151 səhiyyə obyekti və 2400 digər sosial və təsərrüfat obyektləri istiliklə təmin edilir. Cəmiyyətin təsərrüfatlarında 27 mindən artıq qoruyucu klapan, siyirtmə, əks klapanlar, 10 mindən artıq müxtəlif diametrli ventillər, 1000 km-ə yaxın magistral və məhəllə daxili istilik xətləri istismar edilir. Bu gün əsas vəzifə növbəti istilik mövsümünə hazırlıqla bağlı nəzərdə tutulan tədbirlərin vaxtında icra edilməsi və istilik təchizatının keyfiyyət parametrlərini yüksəltməklə vətəndaş məmnunluğunun təmin edilməsindən ibarətdir.
Görüşdə qarşılıqlı maraq doğuran məsələlər barədə fikir mübadiləsi aparılıb.
