Yaşadığınız binanın zirzəmisində müşahidə olunan axıntı binanın daxili infrastrukturuna aiddir və bu məsələnin həlli mənzil mülkiyyətçilərinin səlahiyyətinə daxildir. “Azəristiliktəchizat” ASC-nin məsuliyyət zonası binadaxili sahəyə qədər nəzərdə tutulan obyekt və infrastrukturla məhdudlaşır.
Qeyd edək ki, “Azəristiliktəchizat” ASC öz korporativ sosial məsuliyyət proqramları çərçivəsində bəzi binaların daxili istilik sistemlərinin və infrastrukturlarının bərpasını və yenilənməsini əlavə dövlət maliyyəsi tələb etmədən həyata keçirmişdir.
Cəmiyyət tərəfindən göstərilən isti su xidməti tarifləri faktiki xərclər, habelə əhalinin bütün təbəqələrinin maraqları nəzərə alınmaqla müəyyənləşdirilib.
“Azəristiliktəchizat” ASC-nin mənbələrindən istilik enerjisi ilə təmin edilən 16 Mənzil-Tikinti Kooperativinə (MTK) məxsus hündürmərtəbəli yaşayış binası mövcuddur. Ümumilikdə isə, 3800-dən çox yaşayış binası istilik təchizatı şəbəkəmizə qoşulub. Yəni, təcrübəmizdə belə hallar qeydə alınıb. Yeni tikililərin məxsus olduğu MTK-lar bununla bağlı texniki şərt almaq üçün müvafiq müraciət etməlidir. Əgər yaxınlıqda istilik mənbəyi, yəni qazanxana varsa və həmin binanın istiliklə təminatı digər mənzillərin istilik təminatında keyfiyyətə mənfi təsir etməyəcəksə, müraciətə müsbət cavab verilə bilər.
